الأورام الليفية في الرحم او تليف الرحم … يعني إيه ؟

• الأورام الليفية في الرحم معروفة بأسماء كثيرة فممكن تسمعي عن ألياف الرحم أو تليف الرحم أو ليفة الرحم أو لوفة الرحم أو الورم الحميد بالرحم أو عقد الرحم أو العقدة الليفية في الرحم أو فيبروم الرحم أو uterine fibroids أو Myoma .
• ما هو الورم الليفي ؟ أيا كان الإسم فإن الورم الليفي في الرحم هو نوع من أورام الرحم و هو ورم حميد ينشأ من الخلايا العضلية المكونة لجدار الرحم و علشان كده الأورام الليفية تتواجد فقط في جدار الرحم و لا تنتشر خارج الرحم لأي جزء من أجزاء الجسم .
• و لأن ستات كتير بتسأل عن طبيعة الأورام الليفية في الرحم فبنؤكد أنها ليست أورام خبيثة أو سرطانية و لذلك يجب ألا نخلط بين سرطان الرحم و أورام الرحم الليفية .
• و لكن رغم إنه ورم حميد إلا إن 3 إلى 5 سيدات من كل عشرة بعد سن البلوغ عندهم ورم ليفي و دي نسبة عالية جدا و لذلك تعد أورام الرحم الليفية أكثر أورام الحوض حدوثا لدى المرأة في فترة الحيض.
• و ممكن الأورام الليفية تظهر عند الفتيات في أي وقت منذ سن البلوغ و حتى النساء في سن انقطاع الدورة الشهرية (الطمث) و لكن يندر ظهورها قبل سن العشرين وقليلا ما تستمر الأعراض بعد سن اليأس و انقطاع الدورة الشهرية.

• الخلايا العضلية المكونة لجدار الرحم هي نفسها الخلايا التي تكون ورم الرحم الليفي و لكن اللي بيحصل إن مجموعة من الخلايا دي بتنمو بصورة سريعة و بتتحوط بطبقة من الألياف أو الأنسجة الليفية و علشان كده بنسميها أورام ليفية أو ألياف الرحم.
• هل الورم الليفي خطير يعني طالما هي أورام حميدة ليه بنحتاج نعالجها ؟ المشكلة إن تليف الرحم بيختلف من مريضة للتانية من حيث

• عدد الأورام الليفية اللي ممكن يكون ورم واحد أو مجموعة من الأورام.
• مكان الأورام الليفية في جدار الرحم
• حجم الأورام الليفية اللي بيتراوح من ملليمترات في حجم حبة العدس وحتى أحجام تصل إلى أكثر من 30 سم يعني في حجم الجنين الكامل.

• و بناء على عدد و مكان و حجم الورم الليفي في الرحم هتختلف الأعراض اللي بتشعر بها المريضة كما هو مذكور في أعراض الأورام الليفية أو تشخيص الأورام الليفية و دا اللي بيخلينا لازم نعالجها.
• المشكلة إن أورام الرحم الليفية بتحتاج كميات كبيرة من الدم علشان يوصلها الأكسجين و الغذاء اللي بتحتاجهم لتستمر في التواجد و النمو , علشان كده بنلاقي حول الورم الليفي شبكة مهولة و ضخمة من الشرايين و كلها طالعة من شريان الرحم الرئيسي في معظم الأحيان. و دا بيخللي الأورام الليفية حساسة جدا لانقطاع الإمداد الدموي و الغذاء. و أيضا حجم الشرايين المغذية للورم الليفي بيبقى أكبر من حجم شرايين الرحم الطبيعية و هذه الحقائق هي التي تجعل علاج أورام الرحم الليفية بالقسطرة أو ما يسمى قسطرة الرحم أو قسطرة الأورام الليفية فعال وناجح جدا.

التعليقات

التعليقات